Edrych i fyny
Ioan 3.14-21 Grawys 4
Galwad i addoli
Codwyd Iesu ar y groes fel y gallai pawb ddod ato ef.
Gadewch i ni ddewis chwilio am Dduw yn y lle hwn heddiw,
gan gadw ein llygaid yn sefydlog ar Iesu
a dewis ei ddilyn ef.
Gweddi ymgynnull
Dduw creadigaeth a threfn,
bydd gyda ni wrth i ni ymgynnull i addoli.
Helpa ni i feddwl yn ofalus
am y dewisiadau a wnawn a’r bobl yr edrychwn i fyny atynt.
Arwain ni yn nryswch a themtasiynau’r byd hwn.
Dysga ni i edrych i fyny ar oleuni dy Fab, Iesu Grist,
i gael arweiniad ac ysbrydoliaeth.
Amen.
Gweddi ddynesu
Arglwydd Dduw, nesawn at dy oleuni.
Y goleuni sy’n disgleirio yn nhywyllwch ein byd.
Y goleuni sy’n chwilio tywyllwch ein calonnau.
Y goleuni sy’n cael gwared â’r cysgodion sydd o’n cwmpas.
Y goleuni sy’n gwneud i rai droi i ffwrdd oherwydd bod yn well ganddynt y tywyllwch.
Ond codwn ein hwynebau tuag at dy oleuni a cherdded tuag atat.
Arglwydd Dduw, nesawn at dy oleuni.
Amen.
Gweddi o addoliad
Nefol Dad, molwn di fel grym bywyd y bydysawd,
yn llifo trwy bopeth, yn cynnal ac yn adfywio.
Molwn di yn y goleuni sy’n syrthio’n anweledig arnom,
yn ein bendithio ac yn ein harwain atat ti.
Molwn di oherwydd y cariad sy’n rhoi maeth i ni.
Fywyd, goleuni a chariad, addolwn di.
Amen.
Gweddi o gyffes
Arglwydd, mae dy oleuni wedi gorlifo dros y byd;
ond rydym ni wedi troi i ffwrdd am fod yn well gennym y tywyllwch.
Arglwydd, rwyt ti wedi codi dy Fab i fyny fel ein bod ni yn cael maddeuant;
ond rydym ni wedi troi i ffwrdd am fod yn well gennym aros yn ein pechodau.
Arglwydd, rwyt ti wedi cynnig bywyd tragwyddol i ni;
ond rydym ni wedi troi i ffwrdd am fod yn well gennym bleserau bywyd daearol.
Maddau i ni, O Arglwydd, wrth i ni blygu ein pennau o’th flaen.
Dydym ni ddim yn troi i ffwrdd bellach.
Rydym yn codi ein hwynebau i chwilio am dy oleuni.
Rydym yn codi ein llygaid i weld dy Fab.
Rydym yn codi ein calonnau i fyw ynot ti, ac er dy fwyn di, am byth.
Amen.
Sicrwydd o faddeuant
Cododd Duw y sarff yn yr anialwch er mwyn i blant Israel gael eu hiacháu; cafodd y rhai a ddewisodd edrych ar y sarff fyw.
Cododd Duw ei Fab ar groes er mwyn i bawb gael eu hachub a chael bywyd tragwyddol; maddeuir pechodau’r rhai sy’n dewis credu ynddo, a chânt wybod am lawenydd y nefoedd.
O Dduw, rwyt yn cynnig dewisiadau i ni bob dydd; ein dewis ni yw penderfynu rhwng y da a’r drwg, llwybr cyfiawnder neu’r ffordd i ddistryw.
Diolch i ti am ddangos i ni ffordd daioni a gwirionedd trwy dy Fab.
Diolch i ti am faddau i ni ac am dywys ein traed yn ôl hyd yn oed pan fyddwn yn cymryd y troad anghywir.
Diolch i ti am dy gariad tragwyddol.
Amen.
Gweddi o fawl a diolchgarwch
Dduw yn y nefoedd, pan fyddwn wedi crwydro oddi ar dy ffyrdd di –
diolchwn i ti am roi cyfle i ni newid cyfeiriad.
Pan fydd ein dewisiadau wedi eu llywio gan ein hunanoldeb yn hytrach na’n cariad tuag atat ti –
diolchwn i ti am dy faddeuant.
Pan fyddwn wedi gwrando ar glebran diddiwedd y byd yn hytrach nag ufuddhau i’th Air di –
diolchwn i ti am fod yn amyneddgar gyda ni.
Amen.
Gweddi ar gyfer pob oed gyda’i gilydd
Arglwydd goleuni,
diolchwn i ti am fod yn agos atom bob amser.
Helpa ni i edrych i fyny atat ti.
Pan fyddwn yn grwgnach a chwyno,
helpa ni i edrych i fyny atat ti.
Byddwn yn ddiolchgar am yr holl bethau da sydd yn ein bywydau.
Helpa ni i edrych i fyny atat ti.
Amen.
Litani diolchgarwch
Am ein byd a’i holl harddwch:
rhown ddiolch heddiw i Dduw.
Am ein creu ni fel ei gampwaith celf:
rhown ddiolch heddiw i Dduw.
Am y lle hwn a’r bywyd yr ydym yn ei rannu yma:
rhown ddiolch heddiw i Dduw.
Am ein cartrefi a’n teuluoedd, ein ffrindiau ac amseroedd da:
rhown ddiolch heddiw i Dduw.
Am fwyd a chynhesrwydd, am gysur a diogelwch:
rhown ddiolch heddiw i Dduw.
Arglwydd, helpa ni bob amser i gofio am dy gariad ac am dy roddion.
Amen.
Gweddi i gloi
Arglwydd goleuni,
helpa ni i edrych tuag atat ti yn yr wythnos sy’n dod.
Arwain ni pan fydd y ffordd ymlaen yn edrych yn dywyll ac yn llawn rhwystrau.
Rhown ddiolch bob amser, hyd yn oed yn yr amseroedd tywyllaf,
a galluoga ni i ddisgleirio fel goleuadau yn y byd.
Amen.